الخوري كامل كامل: مين اللي نهب ثروة البلد؟ مين اللي نشّف خزينة الدولة؟ مين هوي صاحب الصفقات والسمسرات والمشاريع المشبوهة؟ - Lebanon news - أخبار لبنان

الخوري كامل كامل: مين اللي نهب ثروة البلد؟ مين اللي نشّف خزينة الدولة؟ مين هوي صاحب الصفقات والسمسرات والمشاريع المشبوهة؟

الخوري كامل كامل: مين اللي نهب ثروة البلد؟ مين اللي نشّف خزينة الدولة؟ مين هوي صاحب الصفقات والسمسرات والمشاريع المشبوهة؟

مين المسؤول عن وجع الناس؟

مين المسؤول عن القلّة بالبلد؟

مين المسؤول عن هجرة شبابنا؟

مين المسؤول عن إنهيار عملتنا؟

مين تديّن وصار الدين العام الاعلى بالعالم بالنسبة للناتج القومي؟ وكرمال شو؟

ليش ما في كهربا؟ شو قصة الجباية ناس بتدفع مئة بالمئة وناس ما بتدفع ألف بالمئة!!!

ليش المي مقطوعة وعنا أكبر مخزون للمي بكل الشرق؟ ليش ولاد البلد بدن يدفعوا فاتورتين ٢ كهربا و٢ مي!!! ليش موتور الحي بيربح وشركة الكهرباء بتخسر؟

مين اللي نهب ثروة البلد؟ مين اللي نشّف خزينة الدولة؟ مين هوي صاحب الصفقات والسمسرات والمشاريع المشبوهة؟

ليش اللبناني بدو يِنزلّ ع بواب المستشفى؟ ليش ما في ضمان لكل الناس، أو إنو المرض ع ناس وناس!! والاستشفاء لناس وناس!!!

ليش اللبناني بدو يدفع الفوقو والتحتو تيعلم ولادو وبعدان بس يتخرحوا ما يلاقوا شغل بالبلد؟ أو إنو العلم والشغل بس للمحاسيب والازلام…

مين المسؤول عن التلوث بالهوا والتراب والمي؟

ليش الزبالة بالطرقات وبالانهر وبالبحر وبالجبال والوديان؟ معقول مش قادرين نعالج النفايات بمعامل عصرية ومواصفات عالمية؟

معقول ولادنا بياكلوا وبيشربوا سموم؟ معقول بياكلوا فواكه وخضرا مروية بالمجارير؟!

معقول نسبة مرض السرطان بلبنان هي الأعلى بالعالم؟! ونسبة الفقر الاعلى بالمنطقة ونسبة الهجرة… في شي بلد بالعالم ولادوا مشرشرين بكل بقاع الارض؟!!

مين اللي نهب الإسكان واستغل موقعو بالسلطة تيمد إيدو ع مال الناس ويقطع أمل وأحلام الشباب؟!!

اذا المواطن اشتكى إنو جوعان ما بيكون كافر، واذا طالب بحقوقو ما بيكون خاين، وإذا قال بدو عدالة إجتماعية…عدالة توزيع…عدالة الحق والقانون ما  بيكون عميل؟!!

الناس تعبت بدها تعيش بكرامة، من دون مرض الطائفية، من دون مرض التحزب والاستسزلام لحدا من دون حروب…

الناس بتحب الحياة، بتحب الفرح، بتحب السلام بتحب العيلة وبتحب الوطن… والناس هني مصدر السلطة والسلطة لازم تكون لخدمتهم مش العكس.

الله يحمي لبنان

leave a reply