قطع الكهرباء عن فرن الفقراء للاب مجدي علاوي‎ - Lebanon news - أخبار لبنان

قطع الكهرباء عن فرن الفقراء للاب مجدي علاوي‎

قطع الكهرباء عن فرن الفقراء للاب مجدي علاوي‎
أخبار الكنيسة اليومية عبر موقع أليتيا – تابعونا على الرابط التالي : https://ar.aleteia.org/

لبنان/أليتيا(aleteia.org/ar)عجبني كتير ردّ وزيرة الطاقة ندى بستاني على قضية قطع الكهرباء عن فرن “الفقراء” التابع لجمعية ” سعادة السما” اللي بيقصدو ٦٠٠ ولد تياكلو منقوشة سخنة يومياً وبيطعمي ١٢٠ ختيار قبل الدوا، قالت الوزيرة حرفياً على حسابها على “تويتر” : “ما حصل بعد متابعتي لموضوع انقطاع التيار الكهربائي عن جمعية “سعادة السماء” واتصالي بالأب مجدي علاوي، وإرسالي فريقاً من الفنيين للوقوف على حقيقة الواقع، تبيّن ان هناك فواتير غير مسددة، فوعد الأب علاوي بدفعها اليوم. يهمّني التأكيد ان المواطنين متساوون في الحقوق والواجبات…”
هيدا حلمنا من زمان معالي الوزيرة إنو المواطنين يكونوا متساويين بالحقوق والواجبات وخصوصاً بالكهربا، لكن الواقع غير هيك تماماً لأنو كل الدراسات بتأكد إنو العجز المالي لمؤسسة كهربا لبنان بيرجع لأسباب كثيرة وأهمها إنو المواطنين بلنان غير متساويين لا بالحقوق ولا بالواجبات.
اللي بدي قولو مش دفاعاً عن “فرن الفقراء” لانو تبين إنو في تقصير بالجباية الفاتورة اندفعت وهيدي مش أول مرة بتصير ولا انتقاداً لمعالي الوزيرة إنما تأكيد على القاعدة الذهبية اللي تفضلت فيها بلكي لأول مرة بتصير وبيشعر المواطن العادي بالعدالة الاجتماعية، وبيكون “فرن الفقراء” فال خير وعبرة لمن اعتبر.
بلكي مجلس الوزراء وبالموازنة ما عاد بيعفي  مناطق معينة عالأراضي اللبنانية من فاتورة الكهرباء لأسباب أمنية.
أو بياخد قرار عادل بيتناسب مع منطق الوزيرة ومنطق العدالة الاجتماعية وبيتراجع عن قرارو بعدم جباية الفواتير من مناطق معينة ومعروفة لأسباب سياسية.
أو بلكي معالي الوزيرة بتبعت الفرق الفنية بالوزارة ع بيوت وقصور ومؤسسات وضيع وأحياء وحارات بعض الجهات الفاعلة والمؤثرة بالدولة تيدفعوا فواتيرن المكسورة والمهدورة من زمان.
أو بلكي بتتصحح تعرفة فواتير أصحاب الامتيازات..
أو بينحط ساعات شرعية ومش وهمية لكل الناس، وتكون التعرفة متل بعضا لكل الناس، وبيطبّق القانون ع كل الناس وما يكون في ناس بسمنة وناس بزيت، وبتجي الكهرباء والمي ٢٤/٢٤ بكل المناطق اللبنانية ولكل الناس.
معالي الوزيرة نسبة الهدر بمؤسسة كهربا لبنان أكثر من ٥٠ بالمئة وطبعا من زمان ومش ع إيامك وهي الأكبر بالعالم، كل تمنياتنا إنو التدبير اللي تاخد بحق ‘فرن الفقراء” يتعمم عالكل تنحس فعلا إنو المواطنين متساويين بالحقوق والواجبات، ومن بكرا تبلش نسبة الجباية تزيد والهدر يخف ويصير العجز صفر بالمية وهيك بيكون أبونا مجدي استحق عن جدّ يكون من صناع الأمل وياخد جايزة بالإمارات العربية المتحدة ولو أخد ضبط بلبنان، ومعالي الوزيرة بتكون حققت أمل كل المواطنين اللبنانيي وحلّت مشكلة الكهرباء..

بكل محبة..

 

انضمّوا إلى هذه الصفحة التابعة لأليتيا لتصلكم أخبار اضطهادات المسيحيين في الشرق والعالم:

ALETEIA

العودة الى الصفحة الرئيسية 

leave a reply